شر البليّة ما يضحك(1) !!!

أحبائى ..
لأن شر البليّة ما يضحك وليس هناك بليّة أكبر من حوارات الطرشان التى تعج بها ساحاتنا الحوارية على مختلف المستويات وجميع الأصعدة فقد أجريت لكم هذا الحوار بين مسئول صغير وآخر كبير فى مصرنا المحروسة...

( نموزج (1))
.........................

*- أيوه يافندم كله تمام !!


*- حمام إيه يابنى ده نعام..


*- أيوه يافندم فيه كلام عن إضراب..


*- إعجاب أخيرا كله بقى تمام..


*- حمام إيه!! بقول لسعادتك إضراب..


*- الناس عاوزة جزمة وشراب..طيب لما نكفيهم الأول عيش..


*- ألمّهم كلك وأوديهم معتقل العريش...


*- آه بتقول عايزين جبنة قريش....


*- العريش !!يافندم مافيش معتقل فى العريش....


*- يعنى إيه علي الجبنة القريش جمارك وضرايب..


*- أيوه يافندم بس شلاتين وحلايب برضه ما فيهاش..


*- ببلاش ..لأ لازم شوية رسوم لخلى وقعتكم طين..


*- خلاص فهمت عاوزنى أوديهم فلسطين..والله دى أحسن فكرة..


*- ياسلام وأنا لسه حستنى لبكرة لازم دلوقتى بسرعة..


*- وكمان أخليهم يفحتوا ترعة..فى سينا يافندم!!!


*- بتقول إيه عاوزين ناس تخدّم...!!دول شويه رعاع..


*- وأخليهم يزرعوا زعتر ونعناع !! طبعا فى غزة..


*- سلام على الشعب كل واحد عاوز موزة!!!دى خلاص بقة أيام طين..


*- أيوه يا فندم حدخلهم من بوابة صلاح الدين..وعلى طول حنفذ..


*- إيه عاوز حراسة على كل منفذ للبيع ..مش مشكلة عندك الأمن المركزى...


*- ماشى يافندم خلاص كل المتظاهرين والمضربين..يروحوا فلسطين ويفحتوا ترعة فى سينا الأول..


وبعدين يزرعوا فى غزة زعتر ونعناع......


*- يا سلام كمان كل واحد من الشعب عاوز مذياع...دى خلاص بقة ظيطة..


*- مفهوم يا فندم لازم كل واحد يعلّق لسيا دتك.صورة على الحيطة دا شىء لازم..


*- وكمان الطلبة عاوزة كتب وملازم.. دا كل شىء بقى تمام..


*- عندك حق يا فندم النعام أحسن من الحمام....


*- وساكت ليه يابنى روح الحمّام وبعدين ..إبقى إعمل اللى قلتلك عليه...


*- وكمان رز بالخلطة ومايونيز عليه يافندم...أنا خلاص جعت....


*- طيب يابنى روح ما أنا قلت خلاص..


*- أوامر سعادتك أكيد ححشرهم فى ميكرباص..


مع السلامة ....وكله تمام!!!!!!!!!!!!!!


......................................