من سنين واحنا بنغنى
مصر هى أمى
نيلها جوه دمى
شكلها فى سمارى
ضيّها فى ملامحى
حتى لونى قمحى
لون خيرك يامصر
دلوقتى بعد ما بقى الفساد عالى
ومية النيل بقة مية مجارى
والقمح بقى أمريكى واسترالى
ولونه أصفر وبرتقالى
بقيتى إنتى مرات أبويا يامصر
وبعدماالغلاعمّ كل قوت عيالى
والجيب بقى فاضى و خالى
والناس سمعت صراخ ولادى
ومراتى تزن على ودانى
بقيتى إنتى مرات أبويا يامصر
بعد مابقى النظام علمانى رأسمالى
ومبقاش يصعب عليه حالى
أو حتى بيرق ويسمع مر سؤالى
والقهر قطع كل أوصالى
بقيتى إنتى مرات أبويا يامصر
وبعد ما بقاش ملكنا غير السدالعالى
وكل شىء بقى فانى
وأمرى بإيد مستثمرعربى و إسرائيلى
والقرار بقاله فى حالى
بقيتى إنتى مرات أبويا يامصر
وبعد مابقيت عرّضه للقاصى والدانى
والحراميه بقوافى العالى
بيحتكروا وبيسرقواكل كنوزك ومالى
وتقولى عليهم دول عيالى
بقيتى إنتى مرات أبويا يامصر
بعد ما بقيت دايما خلف القضبان غايب
فى سجونك وسجون الحبايب
وبقى لكل كلاب السكك فى خيرك نايب
وشعرى الأسود بقى شايب
بقيتى إنتى مرات أبويا يامصر
بعد مابقى التوب الأبيض كلّه بالى ودايب
والرقع عليه نجوم تلالى
والخيط زينا فيكى بقى عات وكمان دايب
وأرضك مستباحه من شرم لحلايب
بقيتى إنتى مرات أبويا يامصر
ومبقنا ش نقدر نغنى مصر هي أمى
نيلها جوه دمى شكلها فى سمارى
ضيّها فى ملامحى حتى لونى قمحى
لون خيرك يامصر
وينك يمّه.... وينك يمّه... وينك يمّه
..............................
هناك تعليق واحد:
وهذه قصيدة من الفاجومى أحمد فؤاد نجم..
عشان انت مصرى لازم تعانى
وتفقد كرامتك بكل المعانى
وتحرق فى دمك سنين مش ثوانى
واوعى تصدق كلام الاغانى
بتاع الحضاره وكانى ومانى
ده كله هجايص مايدخل ودانى
عشان انت مصرى العذاب بيناديك
بتبدا فى يومك حاجات بترازيك
فى نومك فى قومك تعكنن عليك
تضايقك ولسه العماص فى عينيك
مافيش ميه تشطف صابونه فى ايديك
وجسمك ملزق وريحتك عاديك
فتلبس وتنزل وفيك اللى فيك
ورايح لشغلك حتحتاج مواصله
ادى المترو واقف وكهربته فاصله
وفى الميكروباص خناقه وحاصله
اوتوبيس فرامله عايزالها وصله
وتوك توك ده تايه ومحتاج لبوصله
بتوصل لشغلك بدم اتحرق
فى زحمه وكتمه وحر وعرق
رئيسك سايبلك كومه ورق
ده غير دمغه ضايعه وملف اتسرق
وفى كام مواطن عامللك قلق
بيشكى تقول له روح اندعق
وعركه وهوجه وشاى اندلق
ومخك خلاص من الصداع اتفلق
هترجع لبيتك ده لو كان فى بيت
هتوصل هتندم ياريتك ماجيت
مراتك بتصرخ خلاص استويت
عيالك بتطلب وهات كيت وكيت
تزعق تهاتى ياناس اتهريت
ولاحد سامعك مهما هاتيت
عشان انت مصرى وده للاسف
فلازم تاسى تعيش تتقرف
وكل الاساسى فى حياتك ترف
فتنسى الكرامه وتنسى الشرف
وتسرق وتنصب او تنحرف
ودمعك بيجرى وجرحك نزف
مش انت اللى مصرى؟؟؟ جتك القرف .
بقلم الشاعر الكبير/ احمد فؤاد نجم
إرسال تعليق