لكتب...على أوراق الشجر...!!!

أحبائى...

فى يوميات التعذيب بمصر لتسمحوا لى بالتدوين على إحدى صفحاتها هذه الأرجوزة وهذا الخاطر...حتى ولو على أوراق الشجر...،

***

واحد...اتنين ..
حق المواطن فين...؟؟؟
حق المواطن فى مصر...
لمونة فى بلد قرفانة ...
وكمان تتباع بعد العصر...
ويعيشوه فى زنزانة ....
ويوهموه إنه ساكن قصر...!!
***
واحد...اتنين ..
حق المواطن فين...؟؟؟
حق المواطن فى الأسكندرية...
مهضوم وضايع ميه الميه...
ويقولوا عليه حشاش ..
وكمان من الحرامية...
حتى اسألوا...
رؤساء الصحف القومية...
شافوه بيحشش ويسرق..
فى المعادى ومدينة نصر...!!!
***
واحد..اتنين ...
حق المواطن فين...؟؟؟
حق المواطن من سيدى بشر..
لسيدى جابر....
ضايع ولا حد حاسس ...
ولا حد كمان خابر...
داحتى إمام الجامع...
شهد فى صف المخابر...
إن خالد سعيد...
مات باسفكسيا الخنق...!!!
***
واحد ..اتنين...
حق المواطن فين...؟؟؟
حق المواطن فى المنصورة...
سائق توك توك ...
سحله المخبر أبو شفتورة...
ولم معــــــاه كمان تورة...
وكمّـــــــلوا عليه العصر...
ورموه من الشرفة...
أو من البلكونة وقالوا....
سهّاهم وخد فى وشه زى القطر...!!!
***
واحد ..اتنين...
حق المواطن فين....؟؟؟
حق المواطن فى كل...
ربوع ومحافظات مصر...
لمونة فى بلد قرفانة ....
وكمان بتتباع بعد العصر...
فى وجه بحرى ووجه قبلى...
وفى النوبة وفى سينا ...
وحتى فى شلاتين وحلايب ...
ياناس حق المواطن غايب...!!!
***
واحد..اتنين...
حق المواطن فين...؟؟؟
حق المواطن حالف مايرجع لينا...
إلاّ لما تعود مصر لينا...
من سكان الفيلل والقصور...
فى الساحل الشمالى ومارينا...
ويحكمها ناس زيينا ...
جرّبوا وذاقوا القهر ...
وتجرّعوا مرارة الظلم...
وكمان اتباعو بعد العصر...!!!
***
واحد ..اتنين...
حق المواطن فين...؟؟؟
حق المواطن آهو قصادى...
عمّال بينادى ويهاتى ...
ويّا مصــــــــــر....
مالكم كده يا ولادى ...
تايهين حيارى مظلومين...
وعلى القهاوى وشط البحر...
سكارى مخدوعين....
حاربوا الإستبداد والفساد ...
دا الساكت عن الحق...
شيطان رجيم...!!!
***
واحد..اتنين...
حق المواطن فين...؟؟؟
حق المواطن فى الإصلاح والتغيير...
جملة واضحة مش محتاجة أى تفسير....
من رأس النظام حتى المخبر والخفير...!!!
***
حق المواطن...
حق المواطن دا شىء عادى...
مش بيفرق من سكان المقابر....
لسكان جاردن سيتى والمعادى ...!!!
***
حق المواطن ...
حق المواطن أمانة ليوم الدين ...
مش بتفرق بين المواطنين...
مسلم أوحتى أهل كل دين....!!!
***
حق المواطن ...
حق المواطن واجب مفروض ...
على الآمر قبل عبد المأمور...
فى الشريعة قبل القانون والدستور ...!!!
***
حق المواطن...
حق المواطن فعلا ليمونة...
فى بلد فيها العدل والمساواة...
وكمان بتعيش أمنة ومأمونة...!!!
***
حق المواطن..
حق المواطن لازم يكون فى مصر...
شاهد ومشهود فى كل مكان وكل عصر...
وحتما رغم أنف الجميع ستعيش مصر...
مفيهاش أى مواطن ولا حتى شىء...
يتباع قبل أو بعد العصر!!!
***
حق المواطن..
حق المواطن بيغنى ويقول..
لكتب على أوراق الشجر...
سافر حبيبى وانتحــر...
يا حبيب بدك شـــــــــو ...
شـــــو خلّى قلبك حجر..
شو خلّى قلبك حجر...!!!
***
الله أكبر...الله أكبر...
وتحيا مصر...تحيا مصر...
تحيا مصــــــــــــــــــــــــــــــــر...!!!
***